الثلاثاء، سبتمبر 25، 2007

من هنا وهناك!


لازلت في دبي منذ اخر بوست, الحياة زي ماهي بإستثناء ان عبدالله و خالد رجعوا مصر ودلوقتي انا هنا لوحدي, ودا في حد ذاته مش حاجة وحشة, انا بقالي دلوقتي 4 اسابيع كل اسبوع خروج وبحر و موول و فسح و مرح و تهريج وهزار و مواقف عصيبة و اشياء اخري. الوقت الان مهيئ ان الواحد يقعد يفكر شويه في الدنيا و الناس و نفسة واللي حوالية و كل حاجة, ودي اهم فايدة من السبع فوائد بتوع السفر (بالمناسبة معرفش ايه هما الست فوائد التانيين).

عبدالله سافر التلات, وقبل مايسافر قبلناه يوم الاتنين انا وخالد ومايكل زميل الدراسة القديم, مايكل بيشتغل مع خالد في نفس المشروع وفي نفس الشركة, كان بقالي بتاع سنتين ماشفتش مايكل, المهم قبلناه وقضينا ليله لطيفة في موول الامارات (أضخم وأرقي موول ممكن تشوفه في حياتك), وفي اخر الاسبوع خالد سافر هو كمان.

المفروض دا يديني فرصة زي ماقلت في اني ابتدي أتأمل في الحاجات اللي حواليا, و الدنيا والحياة, انك تخروج من المكان اللي انت اتعودت عليه و تروح تعيش في مكان تاني بيخليك تلقائيا تعمل كده, وتبتدي تفكر في حاجات و تطلع باستنتاجات غريبة, وتاخد بالك من حاجات عمرك ماخدت بالك منها, وممكن تقعد تضحك علي مواقف حصلت كان وقت ماحصلت بتعتبرها مواقف سخيفة, وتفتقد ناس عمرك ماكنت تتصور انك هتفتقدهم, وتنسي ناس كانو في دماغك علي طول لا لشئ غير انك بتشوفهم بصفة مستمرة, وتقرب من ناس كنت فاكر ان عمرك ما هتجتمع معاهم تاني, وتفتكر مشاكل بقاليها سنين, وتضحك من قلبك علي السذاجة اللي كنت بتتعامل بيه في المواقف دي, تنسي مشاكل تانية كنت مخنوق منها قبل ماتسافر علي طول وتنساها بمنتهي البساطة!, السفر و الوحدة مفيد بالتأكيد, بس مش لفترات طويلة, بعد كده هتزهق و تتخنق لما تلاقي ان اقصي مرح ممكن تحصل عليه هو انك تنزل تروح السوبر ماركت علشان تجيب زجاجة مياه معدنية!!

الحاجة التانية اللي بدأت اخد بالي منها هي احوال مصر والمصريين, فعلا والله المصريين دول شعب عايش في منتهي الشقاء و الغم والتعب و الفوضي والجهل, علي الرغم من انهم ناس جدعان و طيبين و ولاد بلد يقفو جنبك و يساعدوك ويودوك في فرحك و يقفو معاك في مصايبك, هما دول المصريين دايما بتجتمع فيهم تناقضات غريبة مستحيل تلاقي تفسير منطقي ليها غير نظرية "هما دول المصريين".

البلد هنا من ساعت ماجيت ماشفتش و لا سمعت ولاحتي قرأت في الجرائد اي خبر وحش, أو ذو تأثير ضار علي اي حاجة, حتي لو بعد مييت سنة, مافيش خالص, الناس هنا مايشة بتبتسم بتلقائية شديدة, لما اروح المسجد مثلا, بعد الصلاة الاقي الناس هادية و سعيدة وزي مايكون ما فيش مشاكل خالص, علي الرغم من الاختلاف الفظيع في الجنسيات واللغات والعادات والتقاليد, تبقي واقف بتصلي التراويح مثلا, يبقي علي يمينك واحد هندي وشمالك واحد باكستاني, ووراك واحد بريطاني, بعد أول ركعتين, يمشي الهندي ويجي واحد ماليزي, يروح البريطاني ويجي واحد إماراتي, كمان ركعتين وتلاقي الباكستني قلب أيراني و الماليزي بقي عم حسين من مصر!!

حاجة من الحاجات اللي هتستغربلها برده, انك وانت رايح المسجد مش لازم تقلع الجذمة وتخدها معاك جوة, أو تحطها في الامانات زي مصر, لأ خالص اقلع الجذمة علي باب المسجد وادخل و لا يهمك, وهترجع تلاقيها في مكانها ماتحركتش, الناس هنا بتتعامل مع بعض بأمانه شديدة, مرة كنت بشتري حاجة من السوبر ماركت و دفعت عشرين درهم والحساب كان 14 تقريبا, ونسيت ومشيت, وبعد مامشيت بفترة, لقيت حد بيجري وعمال يقول Sir, Sir كان واحد من السوبر ماركت بيقول اني نسيت الباقي, مصر برده فيها كده, كفاية موقف ال ATM اللي حصلي قبل ماجي مباشرة.

ايضا الشوارع هنا نظيفة بطريقة غريبة, لاتكات تجد ذرة من الرمال في الشوارع, لكن في مصر التراب بيدخل جوة البيت اساسا و ممكن تضطر تلبس شبشب وانت قاعد في البيت !!

كمان البيوت والعمارات هنا ليها شكل موحد والوان هادية ودايما نضيفة, علي عكس مصر لما تمشي في الشوارع وتتفرج علي البيوت والعماير تحس ان كان في فترة ما كان في حرب أهليه عملت التشوه الفظيع دا في البيوت, العماير كمان مافيهاش بوابين مستعمرين الدور الارضي زي مصر, والأغرب من كده هي ان العماير نفسها مدخلها واسع بطريق مبالغ فيها (أو هو دا الطبيعي بس احنا ما نعرفش!!), ومدخل العمارة فيه ريسبشن فخم كده يقعد فيه الزوار اللي جايين للسكان, وكمان في مكان مخصص للأطفال وكله لعب, وممكن يكون في بسين و قاعة جيم بيجبها السكان مع بعضهم!

كمان موضوع المرور دا عاملي أزمة نفسية, كل ماكنت امشي في القاهرة واشوف الخنقة والزحمة والدوشة والفوضي المرورية الوهمية اللي عمرها ما بتتحل, واقعد احط حلول في منتهي الخيال, وقول ان الكلام دا ممكن يحصل بعد 15 أو 20 سنة, لالقي الكلام دا معمول بيه واكتر منه في دبي من عشرين سنة ولا حاجة!, ماحدش ممكن يكسر اشارة المرور مهما حصل, أخضر يعني تمشي, أحمر يعني تقف, مافيش هزار, ولو انت بتعدي تقاطع بالعربية ولقيت الاشارة خضرا والمفروض تعدي, بس السكة الناحية التانية زحمة, ولو عديت هتبقي واقف في نص التقاطع, تلاقي الناس ما بتعديش ويستني لما الطريق التاني يفضى, علي الرغم ان ممكن الاشارة تقفل عليهم تاني!!

ولما تيجي تعدي الشارع كل اللي عليك انك تدوس علي زرار ظريف كده في اشارة المرور هيخلي الاشارة تقف في اقرب وقت وتعدي الشارع بمنتهي الارتياح, بدل المارثون الوهمي مابينك ومابين السواقين اللي بيحصل في مصر كل ما تعدي الشارع, أيه المشكلة ان الكلام دا يحصل في مصر, أيه اللي ممكن يمنع المصريين انهم يكونو متحضريين بالشكل د؟!

البلد هنا متقدمة جدا والتكنولوجيا داخلة في كل حاجة ودا مسهل حاجات الناس جدا, ممكن تقول علي دا حضارة, بس انا مش متفق مع الرأي دا, في رأي الحضارة حاجة والتقدم حاجة تانية, الحضارة بتيجي من وجود خصوصية في المكان والزمان والناس والتاريخ والاحداث بتتكامل الحاجات دي مع بعض وبيعملو حضارة, أما التقدم فهو ان احنا ناخد بأحدث ماوصل إليه العلم في شتي المجالات, دبي مدينه متقدمة بالتأكيد ولكن هذة ليست حضارة, مصر مثلا رغم كل اللي فيها بس فيها حضارة بدون تقدم, هتقولي ازاي هقولك ماعرفش فرق تاني مابين الحضارة والتقدم هو ان الحضارة حاجة بتحس بيها و تقدر تتعرف عليها, لكن التقدم حاجة مادية وملموسة, علي العموم دا رأي شخصي فلسفي اكتر منه رأي علمي!!

بس علي الرغم من كل دا, انا لازلت مفتقد الحياة في مصر بكل ما فيها و اللي ليها واللي عليها, الحياة في مصر فيها نبض و بتحس بيها بجد, بدل الحياة المُعلبة اللي كلها مياه معدنية و Junk Food, و موولات وسوبر ماركتس و عمارير نضيفة وفيها صالات جيم و ريسبشن فخم للزوار و اشارات مرور متقدمه بطريقة تخنق,أهو دا اللي ناقص بقي, ادوس علي زرار عشان اعدي الشارع, حاجة تنرفز وتحرق الدم بجد!!!



صور الرحلة هنا

هناك 6 تعليقات:

AD يقول...

I'm not using this button anymore, :D, I do cross the road the same way I used to in Egypt.

Anyway I do agree with you about the difference between civilization and being technologically advanced.

see Khalid's valuable comment on my first post:

http://ad-2218.blogspot.com/2006/07/first-days-at-dubai.html

Also I do agree with you about Egypt people, I go love this country more and more nowadays and i don't know why.

"7abbeeet .. w dabbeeet kama el 3ashgg layali twaaaal ..."

"w f kol shebr w 7etta men baladi .. 7etta men kabadi .. 7etta men mawwaaaal"

"Es7a ya Nayem es7a .. wa7ed el razzaa2"

:)

The Groom يقول...


عمرو ابتدى يقارن

يبقى حتنسى مصر يا حلو لو طولت شوية كمان

اوعى يا مان اوعى

حصلي زيك واكتر بس مع الفرق ان البلد اللي انت بتقول عليها دي انا عشت فيها عمري ونزلت مصر حديثا بس فالمقارنة اسوا بمراحل بس متعود على الغربة

عموما

ربنا يصلحلك ويصلحلنا الحال ويصلح حال مصر ويبارك فيها

تحياتي لك من ماناساس البلد

حياه الأحلام يقول...

السلام عليكم

أولا كل سنه وأنت طيب و شكرا على زيارتك مدونتى ونورتنى
وسعيده جدا أن كلامى عن مصر عجبك علشان أنت جربت الغربه وده اللى كنت بتكلم فيه فى البوست أنى علشان انا جربت الغربه بقول كده عن مصر

بس بجد كلامك أنت كمان عن مصر جميل جداجدا معبر علشان أنت حاسه بجد وعايشه

تعرف أنا أكتر بلد بحبها جداجدا ونفسى أزورها هى الأمارات وبحب جدا الشيخ زايد بس دايما أقول لماما حتى لو عشت فى الأمارات برضه مش هلاقى أمان وحياه زى مصر أبدا

عجبنى أوى الجمله اللى قولتها الحياه فى "دبى تقدم من غير حضاره ومصر حضاره من غير تقدم" فعلا كلمه صح اوى وعرفت تعبر صح أوى عنها

أنا دايما بقول الحياه فى الامارات أه جميله جدا ومتقدمه بس "مفيهاش روح" أنما مصر مع انها مش متقدمه بس فيها الروح

ربنا معاك ويهون عليك غربتك وأن شاء الله نقدر نوصل لمصر بحاجه طالما بنحبها حتى لو شوفنا أحلى منها كتير

وجميل طريقك الى المالانهايه

أن شاء الله ربنا يوفقك

ومعلش طولت عليك

ربنا معاك ورمضان كريم وكل سنه وأنت الى الله أقرب ولطاعته أدوم

تحياتى

The Groom يقول...


حياة الأحلام

الشيخ زايد مات سنة 2004 الحمدلله

:(((

ربنا يرحمه ويدخله فسيح جناته

تحياتي لك من ماناساس البلد

Samra' يقول...

Ezzyk Amr 3amel eh..

kalamek 3an Dubai w 3an el takadom ely feha bgd ra2e3 we a7ala haga feh eno rag3ly e7sasy be el Riyadh tany, ana fe3lan kont hasa be kol el hagat de bas ma3a fare2 eny ana bahebha awiiiiiiiiiii

ba7eb el 7aya feha be maswe2ha we 7asantha, yemken 3ashan ana kont 3aysha henak fatra kbera geda men hayaty, ana kont lama banzel masr agaza we arga3 tany el Riyadh kont bahes betanheda kberaaaaaaaaaaa eno akhera rege3t balady :)

bas ba3d keda et3awedt ba2a khalas, la mafar rag3en rag3en...

InshaALLAH raben ayekremak we tekteblna hagat gamda nateget ta2molatek ;)

Sally

حبة حاجات (ايمان) يقول...

ياااااااااه وصفك حسسنى انى عايشة كمان هناك مع انى عمرى ماروحت دبى

بس ياترى لو جيت توصف مصر هتوصفها ازاى؟؟؟؟