الأربعاء، نوفمبر 14، 2007

في مصر مرة أخري



رجعت مصر تاني, المرة دي وانا راجع ماكنتش حاسس زي أول مرة اني مفتقد البلد والناس, بالعكس انا كنت مضايق اني هسيب دبي و الحياة المنظمة النضيفة اللي مافيهاش تلوث ولا دوشة ولاأي حاجة من الحاجات اللي بتضايق الواحد دي.

قبل ما سافر مباشرة يوم السبت ياسر كان عدي عليا واتفقنا نروح العين, وهي من المدن الضخمة اللي تبع إمارة أبوظبي, انا كنت فاكر العين دي إمارة لوحديها بس خيبت ظني وطلعت مدينة كبيرة بس, المسافة من العين لدبي حوالي 140 كيلو, وقبل مانروح العين عدينا علي مول إبن بطوطة, ومول ابن بطوطة فكرته عظيمة أوي حيث يصور المول رحلة الرحالة العربي إبن بطوطة في ارجاء العالم خلال القرن الثامن الهجري (الرابع عشر الميلادي) حينما زار تونس, مصر, الحجاز, الصين, والهند وغيرها من البلاد في 29 عاما مسجلا ما رأه في كتاب رحلاته تحفة النظار في غرائب الأمصار وعجائب الأسفار الشهير برحلات إبن بطوطه.

المول نفسه مقسم إلي اجزاء, حيث تجد الجزء المصري, والهندي, والصيني وهكذا, ويتسم كل جزء بسمات ذلك العصر, فديكور المحلات له نفس خصائص البيوت والمساكن في ذلك العصر, ايضا تجد في المول اماكن مخصصة بشاشات عرض تعرض تاريخ الحضارة الاسلامية واهم انجازات ذلك العصر في الفلك والطب ومختلف العلوم, كما تجد ايضا نماذج من اهم الاجهزة المنتشرة في ذلك االعصر مثل الة الاسطرلاب اللت كانت تستخدم حتي القرن الثامن عشر في الحسابات الفلكية وقد طورها العلماء العرب بطريقة مبهرة لتستطيع القيام بالحسابات الفلكية بمنتهي الدقة.

بعد ماخلصنا مول ابن بطوطة اتجهنا علي العين, كنا عايزين نروح جبل حفيت, وهو جبل سياحي يمكن صعوده بالسيارة, حيث يبلغ ارتفاعة 1700 متر فوق سطح البحر, دا غير ان مدينة العين نفسها مرتفعة عن سطح البحر بشكل ملحوظ حيث تجد الطريق من دبي إلي العين مرتفع في اغلبه.


مدينة العين دي تحفة بجد, منتهي الروعه افضل من أبو ظبي و دبي نفسها, حيث تجد الشوارع هادئة جدا ونظيفة بطريقة ممتعة, وسيلفت نظرك بشدة كمية الخضرا والورد المنتشرة في الشوارع, الشوارع مليانه ورد وشجر و الدنيا ربيع والجو بديع.

المشكلة الوحيدة في البلد دي هي كمية الدوارات المرورية اللي موجوده فيها كل كام كيلو تلاقي دوار يوديك علي مش عارف ايه, تقعد تلف بالعربية, علي عكس دبي وأبوظبي اللي فيها اشارات مررو بدل الدورانات دي.

المهم وصلنا لجبل حفيت, الجبل يبدو صغير من بعيد بس لما تقرب منه هتكتشف قد ايه هو ضخم جدا, ارتفاع الجبل 1700 متر زي ماقلت, وطوله 14 كيلومتر, وفي طريف دوار حول الجبل نفسه للصعود بالسيارة إلي قمة الجبل, الطريق دا خطر جدا وكله ملفات صعبة لازم تكون واخد بالك كويس وانت سايق, وتقعد حوالي نص ساعة في عملية الصعود بالسيارة حتي تصل الي قمة الحبل, لما توصل القمة بقي مش هتصدق نفسك, انت واقف فوق جبل مرتفع فوق سطح الارض ب 1700 متر وشايف كل حاجة صغيرة جدا, الجو فوق الجبل متامشي مع النظرية العلمية اللي بتقول انه كل ما نرتفع عن سطح الارض ب 150 متر بتقل درجة الحرارة درجة واحد سيلزيه, فدرجة الحرارة فوق الجبل كانت حوالي 25 درجة علي اساس انه في الارض حوالي 35 درجة تقريبا, قمة الجبل نفسها ممهده بشكل جميل جدا وهي عبارة عن مساحة 500 متر مربع مستوية ومبلطة بنفس البلاط اللي بيتحط في الشوارع, وفق القمة نفسها في كافيتريا قمة جبل حفيت التي تقدم كافة المشروبات والمأكولات للزوار, المكان كان تحفة بجد احساس جميل جدا لما تبقي فوق جبل وتشوف كل حاجة صغيرة جدا وهواء منعش و هدوء يعم المكان, الشئ اللي كان ملفت للنظر هي ان في ناس مشتريه فيلات فوق الجبل علشان تسكن فيها, ياسر قالي ان دول غالبا من "الشيوخ" بتوع البلد, وكلمة شيوخ هذه لاتعني انه شخص كبير في السن وانما تعني انه شخص ينتمي الي العائلة الحاكمة ويطلق عليه شيخا حتي ولو كان في عز الشباب.

خلصنا رحلة الجبل دي ورجعنا تاني علي دبي, الرحلة علي بعضها كانت حوالي 500 كيلو متر قطعنها بعربية ياسر في يوم واحد, بعد كده رجعنا علي مول الامارات علشان نتعشي في اخد المطاعم الامريكية, ونظرا لاني بعيد عن البيت والاسرة فالاكل بيكون بره في المعتاد, ودا خلاني اجرب كمية كطاعم واكلات من مختلف شعوب العالم, واصبح عندي خبرة معقولة في نوعيات الاكلات وافضل نوعية اكل ممكن تلاقيها في انهي مطعم, يعني مثلا افضل مشويات هتلاقيها في المطاعم اللبنانية, واحسن شورما في المطاعم السورية, وافضل بيتزا و مكرونات هتكون اكيد في المطاعم الايطالية, وهكذا.

المهم رجعت ارض الوطن والحمد لله علي الرغم ان المشروع لسه ماخلصش, بس هبتدي في مشروع جديد في بلد جديد انشاء الله ودا اللي خلاني ارجع مصر, وكده تكون انتهت رحلة دبي بحمد لله.

هناك 9 تعليقات:

حياة الأحلام يقول...

السلام عليكم

أنا أول تعليق:d

حمد الله على السلامه
وزعلت لما قولت ان مصر ما افتقدهاش زى كل مره
عندك حق هناك نظافه وكل حاجه بس هنا الاهل والصحاب
أوعى تخلى البعد يعمل جفا

ورحله جميله وانت بتسردها خلتنى نفسى ابقى هناك حلو اوى انك تشوف كل حاجه صغيره من فوق

حمد الله على السلامه مره تانيه والرحله اللى جايه اسعد ان شاء الله

وعلى فكره ليك تاج عندى ياريت تجاوبه

تحياتى

عـلا - من غـزة يقول...


مرحبا ...

اول مرة اعلق بس متابعاك من زمان

اليوم بالذات حبيت اعلق ,, لأني بحمل كتييير من ذكريات الطفولة في العين :)) المدينة الي آخر مرة كنت فيها .. كانت من حوالي ممممم 14 سنة
!!

عمر ...

بتزكر انو كنا بنشوف جبل حفيت من بيتنا ,, منظره كان تحفة خاصة بالليل .. لأنو انوار الاسفلت بتكون مضاءة .. وبيكون المنظر كأنك شايف نجوم بتتجه نحو الاعلى بشكل منتظم

قريب جدا من الجبل فيه منتزه العين الفايضة ... ياريتك كنت زرته وصورته عشان اشوف كيف شكله صار هههه

عموما بستأذن منك بتسييف الصور عندي وتأملها ومقارنتها بما عندي من صور وذكريات فات عليها كتيييير وصار عليها غبرة

:)

تحياتي

The Groom يقول...


جميل يا عمرو

أنا عشت في العين دي 17 سنة من عمري وأكاد أكون حافظها عن ظهر قلب رغم انها أكيد اتغيرت كتير

بس خير

يللا حمدالله على السلامة

وفكرتنا بالذي مضى الله يسامحك

تحياتي من ماناساس البلد

Amr يقول...

حياة الأحلام:
المشكلة مش ان انا مابقتش افتقد مصر, المشكلة اني كنت مضايق وانا سايب دبي, البلد حلوة وظريفة جدا.
شكرا علي التاج.

عـلا - من غـزة:
انا فعلا زرت العين القابضة, بس افتكر انهم بيسموها العين السخنة دلوقتي, وهي جمب الجبل مباشرة ومكان ظريف برده
علي فكرة في لينك للصور جوا البوست, ممكن تنزليها من هناك.

The Groom:
ازيك يا عبدلله, بقالي كتير ما سمعتش صوتك من ساة العيد, العين دي جامدة جدا, وبلد ظريفة أوي, ليك حق لما ترجع مصر تتضايق

The Groom يقول...


على فكرة يا عمرو

فيه فرق رهيب بين حديقة العين الفايضة

وبين العين الكبريتية السخنة اللي اتعمل عليها حديقة على صغير جنب الجبل مباشرة

دي حاجة ودي حاجة تانية خالص

تحياتي من ماناساس البلد

ميشيل حنا يقول...

حمد الله ع السلامة يا عمرو.
بلوج جميل فعلا.

عاشقه الفردوس يقول...

عودا احمدا يابشمهندس

وصف رائع وجميل يوديك هناك على طول

ملحوظه صغيره
ان شاء الله هكذا وليست انشاء الله

ههههههههههههههههههه

وحمدلله على سلامتك

رحيق الحب يقول...

سلامو عليكم
اولا حمد لله على السلامه يا بطل وان شاء الله ربنا يوفقكك فى شغلك وتحقق اهدافك ومتزعلش على حاجة محدش عارف بكرة فيه ايه ان شاء الله برضو تروح تسافر مكان تانى وتتعلم منه مهو للسفر فوايد برضو وكمان بيعلم الواحد حاجات كتير وانا اسمع عن ابوظبى ودبى والمدن دية انها بجد رائعة جدااااااا حاجة كدة عامله زى اوروبا
ربنا يكرمك يا رب ومنتظرين تحكلنا بقى السفرية المرة اللى جاية على فين

حياة الأحلام يقول...

<<<<< HaPpY BirTH DaY To YoU >>>>

I wish you to achieve all dreams next year
in shaa allh