الاثنين، فبراير 18، 2008

في بلاد الأندلس - 2

بعد قضاء اجازة قصيرة في القاهرة, رجعت اسبانيا تاني, يشاء الله ان يكون اليوم اللي هسافر فيه هو نفسه يوم رجوع المنتخب من غانا, وفي نفس الوقت –العاشرة صباحا- وطبعا سيادة الريس وابنه والحاشية كلها كانت منتظرة "ابطال القارة", ودا عطل اقلاع الطيارة حواللي ساعة, دا غير اني كان لازم اخرج من بيتنا بفترة طويييلة عشان عارف ان الطريق هيتقفل كده كده, ولما رحت المطار لقيت من الناس اللي كان بايت في المطار من امبارح لنفس السبب!!!

المهم, نستكمل الحديث عن اسبانيا واهل اسبانيا.

بالنسبة للسيلرات,فالاسبان والاوربيون عموما بيحبو العربيات الهاتش باك جدا, تقريبا كل العربيات اللي بتشوفها في الشوارع كده, والعربيات اغلبها فرنسية بحجم الجيرة طبعا, وفي الماني طبعا, بس مافيش ياباني خالص.

الرسم علي الحيطان والكتابة عليها يبدو انها احد اهم انواع فنون الفلكور الأسباني, نادرا لما ماتلقيش حيطة مش مكتوب عليها كلام بخط ضخم ومنظم جدا ومرسوم بطريقة جميلة, اكيد دا كلام مش من نوعيه "اللمبي بيحب نوسه" اللي منتشر عندنا علي حيطان مصر, بس الخط جميل وتلاقي كل حرف في الكلمة متلون بلون, دليل علي ان اللي بيكتب دا واحد فنان وعنده مزاج عالي.

اكتر حاجة عذبتني هي الاكل, نظرا طبعا لأن اغلب اللحوم هنا لحم خنزير ويسمي Jamon, ولحم بقري ويسمي Carnee, لازم تاخد بالك كويس, او تقضيها سمك وتونه ومكرونات بقي, ودي حاجة مزعجة جدا في الحقيقة, الظريف اني شوفت ناس اسبان مابيكلوش لحم الخنزير هما كمان, بيقرفو منه, واللي بياكلو بيقلي انه مالوش طعم, بس الناس هنا تحترم جدا رغباتك وينبهوك لو هتاكل حاجة انها ممكن يكون فيها لحم خنزير ولاحاجة.

يوم الاجازة أخر الاسبوع داا يوم مقدس عندهم, لازم الناس تخرج من البيت وتروح الحدائق اللي منتشر مجانا في قلب العاصمة مدريد, حدائق ضخمة جدا وفيها بحيرات عظيمة ومليانه ناس اللي بيقرأ واللي بيرسم واللي بيلعب مع اولاده واللي بيتمش مع خطيبته او صحبته, واللي مأجر عجلة وبيلف بيها الحديقة, كمان المتاحف هنا بتفتح ابوابها مجانا يوم الاحد للجمهور علشان يدخل يتفرج ويتثقف!

السيارات والناس في الشوارع بتحترم اشارات المرور جدا جدا, والشوارع اضلا مهيئة بشكل هندسي علمي وتلاقي قيها كل شيء ممكن تتخيله لتيسير حركة الناس والعربيات, اشارات مروور, علامات علي الارض, عساكر مرور, وعمال النظافة اللي بيلقطو اي حاجة تقع علي الرض في ساعتها علشان البلد ما تتزبلش, كمان عمال النظافة ليه لبس اخضر لامع واللبس دا بينور بلون اخضر باهت مساءا عشان مافيش عربية تخبط الراجل دا لو كان بيشتغل بالليل.

الناس هنا كمان بيتعاملو مع بعض بحميمية زيادة شوية, يعني طبيعي جدا ان تركب المترو وتلاقي شاب وفتاه يتبادلان الاحضان والقبلات علنا, ودا شيئ طبيعي جدا في الثقافات اللي هناك, والناس مش معترضة ولاتلاقي حد يبصولهم خالص وكأن دا شيئ طبيعي.

كمان ممكن تبقي ماشي في الشارع وتلاقي احد الاعلانات "الاباحية" والمستفزة عن احد ماركات الملابس الداخلية!!

برده من الحاجات اللي كانت مزعجة جدا هي اني ماصلتش صلاة جماعة من ساعة ماروحت, كلها صلاة فردية, لان لحد دلوقتي فشلت في اني الاقي جامع, اصلا يعني انا نادرا ما كنت بشوف كنيسة, فهلاقي جامع!, عشان كده لازم يكون معاك بوصلة تعرف تحدد بيها الاتجاهات علشان تعرف اتجاه القبلة, لو ماكنش معاك بوصلة, فبس اعرف اتجاه شروق الشمس فين وبعدين حدد منه اتجاه الشمال, وهتلاقي القبلة في زاوية 103 في اتجاه حركة عقارب الساعة.


من الحاجات الظريف هناك هي ان الفجر بيدن الساعة سابعة إلا ربع, والشروق الساعة ثمانية وربع, تخيل؟ يعني لو واحد بيصحي بدري الساعة 6 علشان يروح الشغل فكده الراجل يصحي ويصلي ركعتين قيام ليل, وينزل علي الشغل يصلي الفجر جماعة مع اصحابة!

أخيرا, حاجة من الحاجات اللي عرفتها هي ان أسم العاصمة مدريد هو اسم عربي في الاصل, فعندما دخل العرب هذة المنطقة وكانت مليانه بمرتفعات تجري فيها المياه فسماها العرب بمجريات المياه, ومع الوقت اصبحت تسمي مجريات, ومع شيوع الاسم وتداوله بين الناس اصبح يسمي بمجريت, ومنها تحرف الي مدريد.

السبت، فبراير 09، 2008

في بلاد الأندلس - 1


بقالي في اسبانيا دلوقتي تلات اسابيع.

اسابنيا بلد جميل فعلا, ومكنتش اتخيل انه في بلد فيها كمية الخضرا والشجر والغابات والانهار والسهول والمرتفعات بالشكل دا, حاجة توهم بجد.

وانت في الطيارة وفي اخر ساعة من الخمس ساعات طيران, 3 منهم فوق البحر المتوسط (من غير الابيض) هتبقي فوق اسبانيا وتشوفو اللي بقولكم عليه دا, عندما في مصر لما يكون في مكان مايكنش فيه بشر, فبيبقي صحراء صفراء, اما هنا فا لو مافيش ناس في غابات وسهول!

بمناسبة الخضرا, الطيارة طارت حوالي نص ساعة فوق الدلتا بتاعت مصر, مساحة هاااااااائلة مشاء الله من الخضرا علي شك مثلث مقلوب, وفيها بقع رمادية متانثرة هنا وهناك, دي تبقي القري المنشرة, ماتقدرش تميز غير المحافظات لانها مساحة اكبر, لما شفت الخضرا دي تساائلت, ياتري الخير دا بيروح فين؟!

أول حاجة هتلفت نظرك لما توصل طبعا هي المطار, مطار فخم جدا وضخم جدا لدرجة انك هضطر تركب مترو علشان تتحرك من مكان وصول الطيارة لمكان استلام الشنط, بيفكرني بمطار القاهرة العظيم اللي لسه سايبة من خمس ساعات زحمة ودوشة وشبه عدم نظام اكتر منه شبه نظام.

تقريبا ما فيش في اسبانيا طريق مستقيم, الطرق كلها طالعة ونازلة كده في سهوله ويسر من غير مطبات ولا اي حاجة, والغريب ان الطبيعة الصعبة دي ماوقفتهمش انهم يبنو عاصمة عظيمة زي مدريد يختلط فيها القديم بالحديث بالطبيعي وبالاعجاز في مزيج مدهش لا تجد غير انك تقف مبهور امامه.

الناس كمان هنا اخلاقهم عالية قوي, وبيتعاملو مع بعض باحترام جدا, كمان الشعب الاسباني فخور جدا بلغته, وتصدقوا لو قلت ان نادرا لو شفت حد بيتكلم بالانجليزي او بأي لغة تانية غير الاسباني, مش ممكن كل حاجة باللغة الاسبانية , الاعلانات, علامات الطرق, حتي التلفزيون كله مسلسلات امريكاني مدبلجة بالاسباني!!

الموضوع دا عاملي ازمة لأني مش بسهول بعرف اتفاهم مع الناس هنا, ولولا اني معايا واحد إنجليزي وناس تاني من اسبانيا مكنش عرفت اعمل حاجة, بس لما سئلت "سكوت" اللي بشتغل معاه وهو من انجلترا اذا كان الاسبان بس هما اللي كد ولا كل اوربا كده, قالي لأ كل اوربا كده الالمان مابيتكلموش غير الألماني, والفرنسيين كذالك وكل اوربا كده!

كمان الناس هنا مهتمة بالقرأة بشكل فظيع, متركبش اي حاجة أو تقف في مكان عام إلا وتلاقي واحد ماسك كتاب, واحدة ماسكة روايه, وهكذا, حتي اني مرة كنت واقف في اشارة مرور ولقيت اتوبيس عام وقف مستني الاشارة والسواق راح مطلع كتاب وقعد يقر فيه لغاية لما الاشارة تفتح!!!

جربت التاكسي بتاع مدريد, برده حاجة فخمة جدا, العربيات كلها حاجة من تلات انواع يا أما أوكتافيا, أو بيجو 406, او مرسيدس عيون أخر موديل!, الاكثرية أوكتافيا, كمان اغلب العربيات هنا تعمل باديزيل مش بالينزين, ودا عكس ماشفت واعرف في البلاد اللي رحتها, المفهوم اللي واخده عن الديزيل هو ثقافة اي مصر بيمشي في الشارع وبيشوف الدخان الاسود والصوت المزعج اللي بيخرج من الميكروباصات وعربيات النقل, اما هنا حاجة تاني خالص, صوت منخفض لاقصي حد, ومافيش تلوث علي الاطلاق, انتشار سيارات الديزل أعتقد علشان زي ماقلت البلد كلها مرتفعات ومنخفضات, فالعربيات محتاجة عزم اكتر من احتياجها للسرعة, وإن كان دا لا يمنع سواق التاكسي من انه يوصل لسرعة 150 عادي جدا ومن غير ماتحس, دا طبعا غير ان كل العربيات مزودة بنظام التوجيه العالمي GPS, والسواق مهما تقله اي مكان يطلعة علي الجهاز ويروحة, بس برغم كده مكان الشغل اللي بشتغل فيه اغلب السواقين بيتوهو وما يعرفوش يوصلولو!, لكن الحقيقة سواقين التاكسي ناس عندهم أمانة بجد, كذا مرة لما كنا بنتوه واحنا رايحين الشغل, تلاقي السواق من نفسه اغلق عداد الأجرة طالما انها دي مشكلته هو لانه مش عارف الطريق. أيضا من الغريب انك تلاقي في ستات شغالين سواقين تاكسي!



المترو الاسباني كمان يبدو انه معجزة هندسية, عشرة خطوط فوق بعضها, هل تتخيل؟ مش زي مصر خطين ولسه هيعملو في التالت, كل الخطوط مغطية مدريد كلها من شمالها لجنوبها لشرقها لغربها, مدريد مش زحمة ولاحاجة, فيها 4 مليون شخص بس, واسبانيا كلها فيها حوالي 38 مليون شخص, يعني اقل من نص عدد سكان مصر.
بالنسبة للسيلرات,فالاسبان والاوربيون عموما بيحبو العربيات الهاتش باك جدا, تقريبا كل العربيات اللي بتشوفها في الشوارع كده, والعربيات اغلبها فرنسية بحجم الجيرة طبعا, وفي الماني طبعا, بس مافيش ياباني خالص