السبت، فبراير 09، 2008

في بلاد الأندلس - 1


بقالي في اسبانيا دلوقتي تلات اسابيع.

اسابنيا بلد جميل فعلا, ومكنتش اتخيل انه في بلد فيها كمية الخضرا والشجر والغابات والانهار والسهول والمرتفعات بالشكل دا, حاجة توهم بجد.

وانت في الطيارة وفي اخر ساعة من الخمس ساعات طيران, 3 منهم فوق البحر المتوسط (من غير الابيض) هتبقي فوق اسبانيا وتشوفو اللي بقولكم عليه دا, عندما في مصر لما يكون في مكان مايكنش فيه بشر, فبيبقي صحراء صفراء, اما هنا فا لو مافيش ناس في غابات وسهول!

بمناسبة الخضرا, الطيارة طارت حوالي نص ساعة فوق الدلتا بتاعت مصر, مساحة هاااااااائلة مشاء الله من الخضرا علي شك مثلث مقلوب, وفيها بقع رمادية متانثرة هنا وهناك, دي تبقي القري المنشرة, ماتقدرش تميز غير المحافظات لانها مساحة اكبر, لما شفت الخضرا دي تساائلت, ياتري الخير دا بيروح فين؟!

أول حاجة هتلفت نظرك لما توصل طبعا هي المطار, مطار فخم جدا وضخم جدا لدرجة انك هضطر تركب مترو علشان تتحرك من مكان وصول الطيارة لمكان استلام الشنط, بيفكرني بمطار القاهرة العظيم اللي لسه سايبة من خمس ساعات زحمة ودوشة وشبه عدم نظام اكتر منه شبه نظام.

تقريبا ما فيش في اسبانيا طريق مستقيم, الطرق كلها طالعة ونازلة كده في سهوله ويسر من غير مطبات ولا اي حاجة, والغريب ان الطبيعة الصعبة دي ماوقفتهمش انهم يبنو عاصمة عظيمة زي مدريد يختلط فيها القديم بالحديث بالطبيعي وبالاعجاز في مزيج مدهش لا تجد غير انك تقف مبهور امامه.

الناس كمان هنا اخلاقهم عالية قوي, وبيتعاملو مع بعض باحترام جدا, كمان الشعب الاسباني فخور جدا بلغته, وتصدقوا لو قلت ان نادرا لو شفت حد بيتكلم بالانجليزي او بأي لغة تانية غير الاسباني, مش ممكن كل حاجة باللغة الاسبانية , الاعلانات, علامات الطرق, حتي التلفزيون كله مسلسلات امريكاني مدبلجة بالاسباني!!

الموضوع دا عاملي ازمة لأني مش بسهول بعرف اتفاهم مع الناس هنا, ولولا اني معايا واحد إنجليزي وناس تاني من اسبانيا مكنش عرفت اعمل حاجة, بس لما سئلت "سكوت" اللي بشتغل معاه وهو من انجلترا اذا كان الاسبان بس هما اللي كد ولا كل اوربا كده, قالي لأ كل اوربا كده الالمان مابيتكلموش غير الألماني, والفرنسيين كذالك وكل اوربا كده!

كمان الناس هنا مهتمة بالقرأة بشكل فظيع, متركبش اي حاجة أو تقف في مكان عام إلا وتلاقي واحد ماسك كتاب, واحدة ماسكة روايه, وهكذا, حتي اني مرة كنت واقف في اشارة مرور ولقيت اتوبيس عام وقف مستني الاشارة والسواق راح مطلع كتاب وقعد يقر فيه لغاية لما الاشارة تفتح!!!

جربت التاكسي بتاع مدريد, برده حاجة فخمة جدا, العربيات كلها حاجة من تلات انواع يا أما أوكتافيا, أو بيجو 406, او مرسيدس عيون أخر موديل!, الاكثرية أوكتافيا, كمان اغلب العربيات هنا تعمل باديزيل مش بالينزين, ودا عكس ماشفت واعرف في البلاد اللي رحتها, المفهوم اللي واخده عن الديزيل هو ثقافة اي مصر بيمشي في الشارع وبيشوف الدخان الاسود والصوت المزعج اللي بيخرج من الميكروباصات وعربيات النقل, اما هنا حاجة تاني خالص, صوت منخفض لاقصي حد, ومافيش تلوث علي الاطلاق, انتشار سيارات الديزل أعتقد علشان زي ماقلت البلد كلها مرتفعات ومنخفضات, فالعربيات محتاجة عزم اكتر من احتياجها للسرعة, وإن كان دا لا يمنع سواق التاكسي من انه يوصل لسرعة 150 عادي جدا ومن غير ماتحس, دا طبعا غير ان كل العربيات مزودة بنظام التوجيه العالمي GPS, والسواق مهما تقله اي مكان يطلعة علي الجهاز ويروحة, بس برغم كده مكان الشغل اللي بشتغل فيه اغلب السواقين بيتوهو وما يعرفوش يوصلولو!, لكن الحقيقة سواقين التاكسي ناس عندهم أمانة بجد, كذا مرة لما كنا بنتوه واحنا رايحين الشغل, تلاقي السواق من نفسه اغلق عداد الأجرة طالما انها دي مشكلته هو لانه مش عارف الطريق. أيضا من الغريب انك تلاقي في ستات شغالين سواقين تاكسي!



المترو الاسباني كمان يبدو انه معجزة هندسية, عشرة خطوط فوق بعضها, هل تتخيل؟ مش زي مصر خطين ولسه هيعملو في التالت, كل الخطوط مغطية مدريد كلها من شمالها لجنوبها لشرقها لغربها, مدريد مش زحمة ولاحاجة, فيها 4 مليون شخص بس, واسبانيا كلها فيها حوالي 38 مليون شخص, يعني اقل من نص عدد سكان مصر.
بالنسبة للسيلرات,فالاسبان والاوربيون عموما بيحبو العربيات الهاتش باك جدا, تقريبا كل العربيات اللي بتشوفها في الشوارع كده, والعربيات اغلبها فرنسية بحجم الجيرة طبعا, وفي الماني طبعا, بس مافيش ياباني خالص

هناك 5 تعليقات:

Nehad يقول...

ايه ده انت في اسبانيا؟ مبسوطة انها عجبتك، هي رائعة فعلا ولو جت فرصة تنزل الجنوب حتعجبك اكتر
انت ذكرت فعلا حاجات حقيقية بهرتني في اول تجاربي مع البلد دي، انسيابية الطرق خصوصا اللي ناحية المطار، الخضرة، القراءة، شبكة المواصلات الجبارة، هم على فكرة 12 خط مترو وبقوا خلاص 45 مليون نسمة

بس هم ما بيتكلموش لغات تانية اعتزاز ولا حاجة، ده عندعم عقد خواجة اكتر من اللي عندنا، حاسين نفسهم اقل من الانجليز والفرنساويين ومن ناحية تانية ضاييعين في اللغات، لسانهم مش سهل في تعلم اللغات، لو سمعت انجليزي من واحد فاهم نفسه انه بيتكلم كويس تكره نفسك، احنا بنطلع نكت علي الانجليزي بتاعهم، حاجة اجارك الله

حلوة صورة بويرتا دي الكالا واحلى حاجة ان قدامها فاضي ومش طالع عربيات، شكلك اخدت وقت عشان تعرف تطلعها كده

ان شاء الله تكون تجربة سعيدة

Amr يقول...

>> ايه ده انت في اسبانيا؟
عشان اكون دقيق, انا دلوقتي في مصر في اجازة, بس راجع اسبانيا بكرة انشاء الله.

البلد ظريفة فعلا, مع اني مختش وقت كافي في اني اشوف كل حاجة بس دي مجرد الانطباعات الاوليه عنها
إن شاء الله هكمل كتابة قريب لما ارجع المرة الجاية اللي هي بعد اسبوع ان شاء الله

غير معرف يقول...

السلام عليكم عمرو
البلوجر بتاعتك هايله ربنا يرزقك فيها الاخلاص ويجعلها فى ميزان حسناتك
كنت عايزه اسالك ايه شكل حياة المسلمين هناك
والحياه سهله بالنسبه لهم
وكنت موجود فى وقت مؤتمر استاذ عمرو خالد
وشكرا وربنا يرجعك لاهلك بالسلامه

حبة حاجات (ايمان) يقول...

يابختك اسبااااانيا
هههههههههههه
لا والله مش قصدى احسدك
بجد البلوج بتاعتك حلوه اوى

وفكرتنى بموضوع احساسك وانت فى المطار فكرتينى بنفس احساسى وانا برده فى المطار وجوا الطياره
بس مش اسبانيا يعنى

عموما ربنا يوفقك

تحياتى

AmR يقول...

أعتقد اوروبا كلها كما قال سكوت صديقك فيها الموضوع ده ، انا كنت في فرنسا ولمست هذا جداً ، كنت بلف كتير علشان الاقي حد بيتكلم انجليزي يساعدني في الطريق ..

بس فيه دول أخرى ليس لها أي هوية زي بلجيكا ، في بروكسل هناك لغتين رسميتين ، الفرنسية والهولندية ، فضلاً عن انك لما تدخل المترو هتسمع لغات اخرى !!

في باريس 12 خط مترو ، وفي بروكسل فيه 6 .. كنت نادراً بحتاج اي حاجة غيرهم !