الاثنين، مارس 24، 2008

مثقف عشوائي - 2


إستكمالا للحديث اللذي لم أكمله عن موضوع مثقف عشوائي, كان المفروض أكمل انا قصدي ايه بالموضوع دا, بس نسيت وكتبت في حاجات تانية.

اللي أقصده بالثقافة العشوائية هو انك تقرأ كل اللي يقع في أيدك من كتب, يعني قراءة مش موجهة ناحية هدف معين غير إكتساب المعلومات, ودي بتخليلي الواحد يعرف حاجات كتير عن كل حاجة, بس مش بنفس قوة انك تقرأ وتركز القراءة في حاجة معينة مثلا.

المهم, بمناسبة الكلام مؤخرا لقيت نفسي كل ما أروح مكان في ريحة كتب أقوم أشتري كل ما يقع تحت يدي من كتب, انا مش من الناس اللي بتربط ما بين شراء الكتب و قرائتها, ممكن أقعد أشتري ومقراش حاجة, ويبقي عندي طابور طويل من الكتب اللي مستنية سعادتي لما أفضي عشان أقرئهم, عدم الربط ما بين شراء الكتب والقراءة انا شايف انه مفيد لأن مش لازم انت اللي تقرأ الكتاب, ممكن أي حد تاني زي أحوك, أبوك, أمك, أختك أو حتي واحد صاحبك هو اللي يقرأ الكتاب دا ويستفيد بيه, مش لازم انت يعني.

أنا مثلا دلوقتي بقرأ كتاب حياة محمد (ص) للدكتور محمد حسين هيكل –مش الصحفي- والكتاب مش انا للي اشترايته, دا والدي هو اللي أشتراه من عشر سنين كده ولا حاجة, هو نفسه مكملش قرائته, عرفت كده لأن والدي عنده عادة لطيفة في تعليم الصفحات اللي بيقف عندها عند القراءة وهو انه بياخد ورقة من نتيجة الحائط اللي بتعرض اليوم والتاريخ ويقوم حاططها في الصفحة اللي وقف عندها, الكتاب دا مثلا لقيت في ورقة نتيجة بتاريخ مايو1997!!


المهم, دا مثال للكتب اللي قرأتها ومشترتهاش, أختي مثلا دلوقتي بتقرا في ديوان قالولي بتحب مصر, قلت مش عارف بتاع تميم البرغوثي, ودا كنت أشتريته من فترة وقرأت فيه حاجات بسيطة.

المهم, دي لسته بالكتب اللي أشترتها في أخر فترة, ولسه بقرأ فيها:

رؤيتي – سيرة ذاتية-محمد بن راشد المكتوم حاكم دبي: كتاب ممتع جدا يتحدث عن نجاح دبي

أبن بطوطة ورحلاته-أدب رحلات, سيرة ذاتية-دكتور حسين مؤنس- من الكتب اللي اشتراها والدي برده وانا لازلت بقرأ فيه من حين لأخر.

جدد حياتك-تطوير الذات-للشيخ محمد الغزالي: كتاب رائع جدا يتحدث عن كيفية تطوير ذاتك.

إستمتع بحياتك-تطوير الذات-للدكتور محمد العريفي: كتاب عظيم جدا يخذك خطوة بخطوة لتتلعلم كيف تعيش حياتك علي النهج اللذي كان يعشيشة الرسول (ص) وخصوصا في مجال الاخلاق والتعامل مع الناس , كتاب ممتع فعلا.

تاريخ الاندلس المصور-تاريخ-للدكتور طارق السويدان: للجماعة مجانين التاريخ أمثالي هيحبو الكتاب دا جدا, يتحدث عن تاريخ الاندلس بكل مراحلة مدعم بالصور الحية.

الموسوعة الميسرة في التاريخ الأسلامي-تقديم دكتور راغب السرجاني: كتاب رااائع يتحدث عن قصة الاسلام منذ عهد الرسول (ص) حتي يومنا هذا.

يوتوبيا-رواية-دكتور أحمد خالد توفيق: روايه تتحدث عما يمكن ان يحدث في مصر بعد 20 سنة من الان, بجد ممتعة جدا جدا جدااااااااااااااا.



الرجال من المريخ والنساء من الزهرة- لسة مقرأتوش بصراحة, بس اسمع انه كويس ولطيف.

ليالي ألف ليلة-أدب-نجيب محفوظ: تجربه "محفوظية" تستحق القراءة.

الوليد-سيرة ذاتية-كتاب يتحدث عن السيرة الذاتية للوليد بن طلال وازاي بقي ملياردير.

عصر العلم-سيرة ذاتية-دكتور أحمد زويل: كتاب رااائع جدا من تأليف الدكتور أحمد زويل بنفسة يتحدث فيه عن سيرته الذاتية ورؤيته للمستقبل, الكتاب مش اكاديمي ولا حاجة, كله بيتكلم عن تجربته الشخصية ونجاحة العلمي, كتاب رائع بحق ويستحق القراءة.

لأ أحد ينام في الاسكندرية-رواية-أبراهيم عبد المجيد: رواية ممتعة فازت بأحسن رواية في معرض الكتاب عام 1996.

قالولي بتحب مصر قلت مش عارف-شعر-تميم البرغزثي, مش محتاج شرح, العنوان يكفي ويزيد!

أخلاق النبي-سيرة- كتاااب ممتع جدت جدا عن أخلاق النبي (ص) وكيف كان يتصرف في المواقف المختلفة, الكتاب مفهرس بالخلق والاستشهادت من السنة النبوية عليها, يعني الشجاعة صفحة كذا, والتواضع صفحة كذا, وهكدذ, أنصح الجميع بقرائته.

عمر بن الخطاب شخصيته وعصرة:- سيرة ذاتية- أيضا الجماعة مجانين التاريخ هيحبو الكتاب دا, مرجعية شاملة عن سيدنا عمر بن الخطاب الصحابي العظيم.

عمر بن عبد العزيز:-سيرة ذاتية- كتاب جميل عن سيدنا عمر بن العزيز, الخليفة الأموي والتابعي الجليل.

أغلب الكتب يا أما سيرة ذاتية أو تاريخ, لأن دول اكتر نوعية كتب بستمتع بقرائتهم, ثم تليهم الرويات والاشعار.

كان نفسي ألاقي كتاب عن الحجاج بن يوسف الثقفي بس مالقتش, بس واحد صاحب مكتبة في محطة الرمل في الأسكندرية قالي اني في رسالة دكتوراه اسمها الحجاج المفتري عليه, قالي انه ممكن يطبعها وينزلها ككتاب, اتمني انه يعمل كده فعلا!

أنا مش من النوع المخلص لكتاب واحد في نفس الوقت, لأ ممكن أقرأ كذا كتاب مع بعض وأبدل ما بينهم علي حسب الوقت والموود والمزاج, يعني دلوقتي انا بقرأ في حياة محمد (ص) وأستمتع بحياتك وأيضا رواية لأ أحد ينام في الأسكندرية.

أيضا من الحاجات اللي بقيت أشتريها كتير مؤخرا هي صور القاهرة القديمة ايام زماان, بقيت مهووس بالصور دي, يمكن عشان الزحمة اللي احنا عايشنها, والتلوث اللي منتشر في الجو, مش عارف, بس بقيت كل ماروح مكان ادور علي الصور دي واشتريها, دار الشروق عندهم مجموعه ظريفه للقاهرة من 100 سنة وأكتر, انا اشتريت كام صورة كده وعلقتهم في مكتبي في الشركة, عاملين شكل ظريف, بس المشكلة اني كل ما أبص عليهم احس بحسرة وحزن علي ما وصلنا إليه الان!


الخميس، مارس 20، 2008

Java Developer Conference!

أشتركت مؤخرا مؤتمر الجافا Java Developer Conference كنظم و عضو في فريق العمل, ودي المرة التالتة ليه اللي بشترك في تنظيم مؤتمرات من هذا النوع. في الحقيقة الاشتراك في المؤتمرات وخصوصا في لجان التنظيم شيء مفيد جدا علي كل المستويات, ففضلا عن انك بتتعلم مجموعة من المهارات اللي مش ممكن تعرف تكتسبها من غير ما تشترك في تنظيم مثل هذة المؤتمرات, من أهم هذة المهارات هي مهارة العمل الجماعي, اكتر مهارة مفتقدة عندنا كمجتمع و كشعب.

ايضا هناك بعض المهارات القيادية اللي بتكتسبها من التعامل مع بقية المنظمين, بالاضافة لمهارات العرض و بعض الدبلوماسية و اللياقة والذوق في التعامل مع الحضور, و أيضا قبل كل شيء هي المسؤلية, تنظيم مؤتمر في أكبر فنادق القاهرة –سيتي ستارز- وفي أكبر قاعة في الفندق –قاعة السرايا- وبحضور ما يقترب من 700 شخص, و 7 شركات من أكبر شركات البرمجيات, و 5 من أهم المساهمين في تكنولوجيا تطوير البرمجيات بلغة الجافا من أكبر شركات في العالم وبرنامج حافل يبدأ من الثامنة صباحا حتي السادسة مساء, مع وجود حوالي 15 منظم عمل ليس بالقليل.

وعلي الرغم من أني انضميت للعمل مؤخرا نظرا لظروف السفر, بس لمست جهد حقيقي من الجميع لإنجاح المؤتمر, وخصوصا من هاشم الشخص الحقيق وراء المؤتمر.

كنت المفروض اني هقوم بتقديم المتحدثين مع القاء كلمة قصيرة عن كل متحدث وعن الموضوع اللي هيتكلم فيه,المتحدثين زي ما قلت من أكبر شركات البرمجيات في العالم من SUN, IBM, Microsoft وفي نفس الوقت دول ناس أجانب ومهم جدا مسألة التنظيم والمظهر وطريقة التعامل إلي أخره, لما وقفت علي Stage عشان اقدم أول واحد من المتحدثين حسيت برهبة مؤقته, لما تقف قدام 700 شخص كلهم بصين ليك ومستنينك تتكلم حاجة مش سهلة, بس الحمد لله الموضوع عدي بسلام والدنيا مشيت كويس.

من الحاجات الظريفة اللي متعودين نعملها هي ان احنا نعزم المتحدثين دول علي الغذاء في اليوم التالي من المؤتمر, طبعا كلهم بيطلبوا يروحو الهرم في أول اليوم, والمرة دي الغذاء كان في أستديو مصر اللي موجود في الأزهر بارك و هو مكان لطيف جدا.

المتحدثين اللي عرفو يجو اليوم دا كانوا اتنين بس, لأن الباقين سافرو في نفس اليوم, واللي عرف يجي هم مستر أيد برنز من شركة SUN, ومستر بويا من Micorsoft.

انا بحب الخروجات دي جدا, كالعادة لأنك بتبعد عن مجال العمل جدا وتتكلم في حاجات أغلبها أجتماعية, مستر أيد كان سألنا كلنا سؤال ياتري كنت تحب تعمل أيه لو مشتغلتش في مجال الكمبيوتر؟, أجابتي انا هي اني أحب أكون مهندس معماري, مع أني مش جامد أوي في موضوع الرسومات الهندسية والكلام دا, بس فكرة انك تشترك في حاجة very long lasting زي كوبري علي النيل, أو مبني رئيسي في مكان حيوي, فكرة انك تيجي بعد 20 سنة مع ابنك وتقوله ان انت اللي صممت المبني دا أو الكوبري دا فكرة مثيرة للخيال بجد.

من الناس اللي جاوبوا برده مستر بويا, وقال انه نفسه يطلع كاتب سفر-Travel Writer- وهي مهنة ظريفة للغايه كل ما يفعلة صاحبها هو انه يسافر إللي مختلف البلاد لكتابة الملاحظات والكتب.

مستر بويا ليه شكل مألوف جدا, تحس انه مصري أبا عن جد, ولما سألته عن الموضوع دا قالي انه إيراني بس هاجر لأمريكا و بريطانيا, ودا لأن في الفترة دي كانت حرب العراق وأيران شغالة وكان التجنيد في أيران من سن 14 سنة, فأبوه سافر بره البلد لما أخوه الكبير كان عنده 13 سنة علشان مايدخلش الجيش الأيراني, ولما سألته بتروح أيران قالي مش كتير بس راحها مرة مؤخرا وحكالنا اللي شافه هناك, هو من الناس اللي بيكره أحمدي نجاد رئيس إيران, ولما سألته ليه قالي اصل انتو عايشين بيعد عن البلد, أحمد نجاد دا فم كبير ومجوع الشعب والناس بقيت تكرهه وتكره الخميني وتترحم علي أيام الشاة –فكرني بالناس اللي في مصر اللي بيترحمو علي أيام الملك –أنا منهم بالمناسبة D:- كمان قالي حاجة غريبة جدا, وهي ان الشباب في أيران مابقوش متدينيين, بالعكس, المساجد في أيران أغلب مرتاديها من العجائز وكبار السن, وفي الحقيقة انا استغربيت من الموضوع دا لأن دا عكس اللي بيحصل في البلاد السنية زي مصر, أغلب مرتادين المساجد في مصر و البلاد العربية زي ما شفت في دبي و السعودية هما الشباب, وهم أحرص من أي أحد أخر علي طلب العلم الشرعي, أيران تنحدر داخليا, الشعب يزداد فقرا, ونجادي يبيع الوهم, والشعب هو من يدفع الثمن في النهاية, الموضوع دا بالظبط فكرني باللي حصل لمصر من 50 سنة, عبد الناصر بيحارب العالم كله, الشعب يصقف, والعرب يشجعوا, وفي النهايه دا اللي أحنا وصلنالوا.

مستر بويا ماكنش عارف ان الشاه مات وادفن في مصر, ودا حصل بعد الثورة الايرانية لما الشاه خرج من إيران ومالقاش حد يستقبله وهو كان مريض بالسرطان, وراح أمريكا ومشوه منها عشان مش عايزين مشاكل مع النظام الجديد -حصلت بعد كده المشاكل دي في حادث السفارة المشهور- وراح كام دوله ومشوه منها برده وفي الاخر الرئيس السادات رحمه الله استقبله في مصر احسن استقبال في خطوة أغضبت المتشددين والارهابين في مصر, بس كان منطق السادات ان الراجل دا وقف مع مصر جامد في حرب 73 و ادانا بترول في عز الحرب فلازم مصر تقف جنبه بالمثل, ولما الراجل مات السادات جاب كل قرايبه وعمله جنازة عسكرية مهيبة بحق تليق بالراجل. قد نختلف أو نتفق علي الشاه كحاكم, ولكن لا نختلف ان اللي عمله السادات الله يرحمة كان منتهي الرجولة والجدعنة, الشاه بالمناسبة اتدفن في مسجد الرفاعي في القاهرة لما طلعنا فوق الهضبة العالية اللي موجودة في حديقة الازهر شاورتله -علي ما أظنه- مسجد الرفاعي, والراجل كان سعيد وممتن جدا للي عملته مصر مع الشاه.

لما سألته عن ديانته, كنت متوقع يقولي مسلم شيعي, بس قالي انا والدي بهائي و أمه شعيية!!!!! و دا مخليه مش راسي علي حاجة منهم, الاكتر من كده هو ان خطيبته هندية كاثوليكيه, وهو شخصيا مهتم بالبوذية جدا و بيقرأ فيها كتييير!!!!, أما مستر أيد برنز فهو مسيحي متدين, لما صحي يوم الاحد الصبح كان بيدور علي كنيسة, ولما قلتله ان الكنائس هنا شرقية المذهب قالي مش مهم مش هتفرق كتير!!!

اليوم كان ظريف بحق, والكلام مع اشخاص من جنسيات مختلفة شيء ممتع للغاية, بالأضافة لنجاح المؤتمر وأستفادة الحضور و استمتاع المتحدثين كله دا اجتمع مع بعضة وكان نجاح يستحق التسجيل.