الاثنين، مارس 24، 2008

مثقف عشوائي - 2


إستكمالا للحديث اللذي لم أكمله عن موضوع مثقف عشوائي, كان المفروض أكمل انا قصدي ايه بالموضوع دا, بس نسيت وكتبت في حاجات تانية.

اللي أقصده بالثقافة العشوائية هو انك تقرأ كل اللي يقع في أيدك من كتب, يعني قراءة مش موجهة ناحية هدف معين غير إكتساب المعلومات, ودي بتخليلي الواحد يعرف حاجات كتير عن كل حاجة, بس مش بنفس قوة انك تقرأ وتركز القراءة في حاجة معينة مثلا.

المهم, بمناسبة الكلام مؤخرا لقيت نفسي كل ما أروح مكان في ريحة كتب أقوم أشتري كل ما يقع تحت يدي من كتب, انا مش من الناس اللي بتربط ما بين شراء الكتب و قرائتها, ممكن أقعد أشتري ومقراش حاجة, ويبقي عندي طابور طويل من الكتب اللي مستنية سعادتي لما أفضي عشان أقرئهم, عدم الربط ما بين شراء الكتب والقراءة انا شايف انه مفيد لأن مش لازم انت اللي تقرأ الكتاب, ممكن أي حد تاني زي أحوك, أبوك, أمك, أختك أو حتي واحد صاحبك هو اللي يقرأ الكتاب دا ويستفيد بيه, مش لازم انت يعني.

أنا مثلا دلوقتي بقرأ كتاب حياة محمد (ص) للدكتور محمد حسين هيكل –مش الصحفي- والكتاب مش انا للي اشترايته, دا والدي هو اللي أشتراه من عشر سنين كده ولا حاجة, هو نفسه مكملش قرائته, عرفت كده لأن والدي عنده عادة لطيفة في تعليم الصفحات اللي بيقف عندها عند القراءة وهو انه بياخد ورقة من نتيجة الحائط اللي بتعرض اليوم والتاريخ ويقوم حاططها في الصفحة اللي وقف عندها, الكتاب دا مثلا لقيت في ورقة نتيجة بتاريخ مايو1997!!


المهم, دا مثال للكتب اللي قرأتها ومشترتهاش, أختي مثلا دلوقتي بتقرا في ديوان قالولي بتحب مصر, قلت مش عارف بتاع تميم البرغوثي, ودا كنت أشتريته من فترة وقرأت فيه حاجات بسيطة.

المهم, دي لسته بالكتب اللي أشترتها في أخر فترة, ولسه بقرأ فيها:

رؤيتي – سيرة ذاتية-محمد بن راشد المكتوم حاكم دبي: كتاب ممتع جدا يتحدث عن نجاح دبي

أبن بطوطة ورحلاته-أدب رحلات, سيرة ذاتية-دكتور حسين مؤنس- من الكتب اللي اشتراها والدي برده وانا لازلت بقرأ فيه من حين لأخر.

جدد حياتك-تطوير الذات-للشيخ محمد الغزالي: كتاب رائع جدا يتحدث عن كيفية تطوير ذاتك.

إستمتع بحياتك-تطوير الذات-للدكتور محمد العريفي: كتاب عظيم جدا يخذك خطوة بخطوة لتتلعلم كيف تعيش حياتك علي النهج اللذي كان يعشيشة الرسول (ص) وخصوصا في مجال الاخلاق والتعامل مع الناس , كتاب ممتع فعلا.

تاريخ الاندلس المصور-تاريخ-للدكتور طارق السويدان: للجماعة مجانين التاريخ أمثالي هيحبو الكتاب دا جدا, يتحدث عن تاريخ الاندلس بكل مراحلة مدعم بالصور الحية.

الموسوعة الميسرة في التاريخ الأسلامي-تقديم دكتور راغب السرجاني: كتاب رااائع يتحدث عن قصة الاسلام منذ عهد الرسول (ص) حتي يومنا هذا.

يوتوبيا-رواية-دكتور أحمد خالد توفيق: روايه تتحدث عما يمكن ان يحدث في مصر بعد 20 سنة من الان, بجد ممتعة جدا جدا جدااااااااااااااا.



الرجال من المريخ والنساء من الزهرة- لسة مقرأتوش بصراحة, بس اسمع انه كويس ولطيف.

ليالي ألف ليلة-أدب-نجيب محفوظ: تجربه "محفوظية" تستحق القراءة.

الوليد-سيرة ذاتية-كتاب يتحدث عن السيرة الذاتية للوليد بن طلال وازاي بقي ملياردير.

عصر العلم-سيرة ذاتية-دكتور أحمد زويل: كتاب رااائع جدا من تأليف الدكتور أحمد زويل بنفسة يتحدث فيه عن سيرته الذاتية ورؤيته للمستقبل, الكتاب مش اكاديمي ولا حاجة, كله بيتكلم عن تجربته الشخصية ونجاحة العلمي, كتاب رائع بحق ويستحق القراءة.

لأ أحد ينام في الاسكندرية-رواية-أبراهيم عبد المجيد: رواية ممتعة فازت بأحسن رواية في معرض الكتاب عام 1996.

قالولي بتحب مصر قلت مش عارف-شعر-تميم البرغزثي, مش محتاج شرح, العنوان يكفي ويزيد!

أخلاق النبي-سيرة- كتاااب ممتع جدت جدا عن أخلاق النبي (ص) وكيف كان يتصرف في المواقف المختلفة, الكتاب مفهرس بالخلق والاستشهادت من السنة النبوية عليها, يعني الشجاعة صفحة كذا, والتواضع صفحة كذا, وهكدذ, أنصح الجميع بقرائته.

عمر بن الخطاب شخصيته وعصرة:- سيرة ذاتية- أيضا الجماعة مجانين التاريخ هيحبو الكتاب دا, مرجعية شاملة عن سيدنا عمر بن الخطاب الصحابي العظيم.

عمر بن عبد العزيز:-سيرة ذاتية- كتاب جميل عن سيدنا عمر بن العزيز, الخليفة الأموي والتابعي الجليل.

أغلب الكتب يا أما سيرة ذاتية أو تاريخ, لأن دول اكتر نوعية كتب بستمتع بقرائتهم, ثم تليهم الرويات والاشعار.

كان نفسي ألاقي كتاب عن الحجاج بن يوسف الثقفي بس مالقتش, بس واحد صاحب مكتبة في محطة الرمل في الأسكندرية قالي اني في رسالة دكتوراه اسمها الحجاج المفتري عليه, قالي انه ممكن يطبعها وينزلها ككتاب, اتمني انه يعمل كده فعلا!

أنا مش من النوع المخلص لكتاب واحد في نفس الوقت, لأ ممكن أقرأ كذا كتاب مع بعض وأبدل ما بينهم علي حسب الوقت والموود والمزاج, يعني دلوقتي انا بقرأ في حياة محمد (ص) وأستمتع بحياتك وأيضا رواية لأ أحد ينام في الأسكندرية.

أيضا من الحاجات اللي بقيت أشتريها كتير مؤخرا هي صور القاهرة القديمة ايام زماان, بقيت مهووس بالصور دي, يمكن عشان الزحمة اللي احنا عايشنها, والتلوث اللي منتشر في الجو, مش عارف, بس بقيت كل ماروح مكان ادور علي الصور دي واشتريها, دار الشروق عندهم مجموعه ظريفه للقاهرة من 100 سنة وأكتر, انا اشتريت كام صورة كده وعلقتهم في مكتبي في الشركة, عاملين شكل ظريف, بس المشكلة اني كل ما أبص عليهم احس بحسرة وحزن علي ما وصلنا إليه الان!


هناك 3 تعليقات:

adam يقول...

السلام عليكم

موضوع رائع

وانت واضح إنك مثقّف
اللهم لا حسد احنا بنأر بس

بس تعرف إن الثقافة العشوائية
أثرها يكاد لا يستشعر

بمعنى إنك اما تقرا في مجال معيّن وتركز جهودك هتنجز فيه مرحلة وشوط

تقدر تتحرك ساعتها لمجال تاني تتقنه وتدخل على غيره

طبعا ده مش معناه التخصص البحت ولكن أكيد وانت بتقرا مجموعة روايات مثلا

هيقع تحت ايدك كتاب تاريخ مثلا فتشتريه وتقلّب فيه بس الصح من وجهة نظري المتواضعة

انك متبدأش فيه إلا اما تخلص مجموعة الروايات دي وتعمل تقرير صغير عن اللي توصلت له من خلال قراءتك
بكده مش بس هتبقى مثقف منظم

لا انت ممكن تبقى احسن من المتخصص المالك للأدوات العلمية أكتر منك

وأنا بشوف ده في مجموعةمن أصدقائي
مش متخصصين خالص في اللغة العربية

بيعملوا كده لاحظت انهم تفوقوا عليا
انا وكتير من أصحابي مع إننا متخصصين في اللغة وآدابها

عالعموم القراءة هي الحياة
وده
منختلفش عليه

وأنا سعيد جدا بيك

وياريت نكون أصدقاء

آدم

أدّعي كتابة الشعر والقصة
عندي مدونة

لكلّ الناس

ياريت تشرفني بزيارتك

Bent El Islam يقول...

السلام عليكم ورحمة الله.. أنا للاسف مقصرة جدا فى حكاية القراءة مع انى كنت بقرأ وانا اصغر فى مرحلة 16 سنة وكده كنت بحب اقرأ اكتر حاليا مش عارفه . بس بعد ما اتفرجت على حلقة برنامج (خدعوك فقالوا) للداعية الرائع مصطفى حسنى الجمعة اللى فاتت حسيت انى لازم ارجع اقرى تانى وهوه كمان قام بوضع أسماء بعض الكتب عشان يحاول ساعد الناس على القراءة من جديد لأننا أمة إقرأ فلازم نقرأ.. شكرا على الموضوع وربنا يوفقك
ده لينك الموقع
http://www.mustafahosny.com/mh/block.php?name=General&item_id=5579

yasmina يقول...

اختيارك لما تقرأ مميز جدا، وتقريبا قرأت معظم هذه الكتب وبما أنك تفضل قراءة التاريخ والسير الذاتية فأنصح بقراءة "ثلاثية غرناطة" لرضوى عاشور - إذا لم تكن قد قرأتها- وهى رواية تسرد فيها الكاتبة تاريخ سقوط الأندلس في شكل روائي أكثر من رأئع. أكاد أجزم أن هذا الكتاب من أجمل ما قرأت حول الأندلس وتاريخها حيث إنها تركز على الجانب الانساني الاجتماعي. كما أن لها رواية أخرى باسم "فرج" وهى سيرة ذاتية تسرد من خلالها تاريخ المعتقلات وتاريخ مصر منذ الثورة وحتى انتفاضة فلسطين الثانية.